الحكاية اللي غيّرت حياتي: من غرفة العمليات… لطريق إصلاح الأنظمة الصحية

في حياة أي دكتور، فيه مواقف بتفضل محفورة في الذاكرة، بتسيب أثر مش بيروح، وممكن تغيّر مسار حياته بالكامل.
أنا شخصيًا، في بداية طريقي كطبيب تخدير، اتعرضت لموقف عمري ما هنساه… يمكن هو اللي خلاني بعد سنين أغيّر مساري من علاج الأفراد لعلاج الأنظمة.

ليلة فرح انتهت بمأساة

سنة 1994، كنت لسه نائب في قسم التخدير.
في نص الليل، دخل علينا لغرفة العمليات عريس وعروسة، لسه مخلصين فرحهم، لكن القدر كتب لهم حادثة سير وهما راجعين.
المنظر كان صعب… فرحة اتحولت لحزن في ثواني.

أستاذي، أستاذ كبير في التخدير، عمل كل اللي يقدر عليه علشان ينقذهم. العريس كانت حالته مستقرة نسبيًا، لكن العروسة… حالتها سيئة جدا، وفضلنا نحاول. و بعد كل محاولات الإنعاش… العروسة فارقت الحياة.

الصدمة كانت قوية. وأنا واقف مذهول، الأستاذ بصلي وقال جملة عمري ما نسيتها:
“أنا لازم أمشي… كمل إنت النبطشية، ولو احتجت حاجة، اطلب دكتور تاني”.

وقتها حسّيت إنه بيهرب من المسئولية، وقلت لنفسي: “إزاي أستاذ كبير يسيبنا ويمشي في اللحظة دي؟”